04.04.2025
Қытайбұршақтың фотопериодтық сезімталдыққа жауапты негізгі гендерін зерттеу
Қазақ егіншілік және өсімдік шаруашылығы ғылыми-зерттеу институтының — Өсімдіктер биотехнологиясы зертханасының кіші ғылыми қызметкері Майкотов Б.Н. 2025 жылғы 3-5 сәуір аралығында Алматыда өткен Халықаралық студенттер мен жас ғалымдардың «Фараби әлемі» ғылыми конференциясында жоғары бағаланып, дипломымен марапатталды. Ғылыми конференцияда зерттеу тақырыбы — «Қытайбұршақтың (Glycine max L.) фотопериодтық сезімталдыққа жауапты негізгі гендерін молекулалық-генетикалық маркерлер арқылы сәйкестендіру және селекциядағы маркерлік технологияларды оңтайландыру» болды.
Зерттеу жұмысы: ҚР Ауыл шаруашылығы министрлігінің 267-бюджеттік бағдарламасы бойынша жүзеге асырылатын ИРН BR22885857 «Қазақстанның азық-түлік қауіпсіздігін қамтамасыз ету мақсатында жоғары өнімді майлы және дәнді дақылдардың сорттары мен будандарын құру және өндіріске енгізу» жобасының аясында жүргізілді. Жоба жетекшісі — Ержебаева Р.С.
Зерттеу барысында фотопериодтық сезімталдыққа жауапты гендердің молекулалық-генетикалық маркерлерін анықтау және селекция процесінде маркерлік технологияларды қолданудың тиімділігін арттыру бойынша маңызды нәтижелер алынуда. Бұл зерттеу еліміздегі ауыл шаруашылығы дақылдарының өнімділігін арттыру мен жаңа жоғары өнімді сорттарды шығаруда қолданылатын молекулалық-генетикалық әдістердің дамуында маңызды қадам болып табылады.
